তোমালৈ মনত পৰে

​

 দিপ্তী ভূঞা 
 

​

হৃদয়ৰ অনুভৱ অনুভুতিবোৰ যদি
এটি এটি মুকুতা হৈ জিলিকে
তুমি দিয়া প্ৰতিশ্ৰুতিবোৰত যদি
সৃষ্টিৰ এক অনাবিল সৌন্দৰ্য আৰু
সুগন্ধি বিয়পে
মন মোৰ তেতিয়া 
ব'হাগৰ বা লাগি
বুকুখনি উথলি উঠে
তেতিয়া জানা  ,
তেতিয়া তোমালৈ মোৰ
মনত পৰে ....।।

অদূৰত বাঁহীৰ অমিয়া সুৰে
মোৰ মনত , মোৰ প্ৰাণত
সপ্তসুৰৰ ৰাগিনী তোলে
সপোনৰ দলিচাত
এপাহি এপাহি ৰক্ত গোলাপ ফুলে
তেতিয়া জানা ,
তেতিয়া তোমাৰ স্মৃতিয়ে
আবেগিক কৰি তোলে
পৰিভ্ৰমী চতুৱা চৰাইজনীয়ে
পাতৰ আঁৰে আঁৰে 
বসন্তৰ বাতৰি দিয়ে
তেতিয়া জানা ,
তেতিয়া তোমালৈ 
বৰকৈ মনত পৰে ....।।

হৃদয় বননিত
কুলি -কেতেকীৰ মিঠা মাতে
মন মোৰ উন্মনা কৰে
প্ৰাণ চঞ্চল হৈ উঠে
বিৰিখৰ ডালে ডালে
কপৌফুলৰ কোমল পাহিয়ে
সোণত সুৱগা চৰে
এটি দুটি জোনাক সৰে
তেতিয়া জানা , 
তেতিয়া তোমালৈ মনত পৰি
হৃদয়খন বিষাদেৰে ভৰি পৰে ....।।
‌‌