শাৰদী ৰাণী

অপৰাজিতা হাজৰিকা

 

বৰ্ষামুখৰ শাৰদী পুৱা

খিৰিকীৰে সোমাই অহা সুগন্ধি বতাহজাকত

বিয়পি পৰক যুগমীয়া শান্তি,

  মুখৰিত হওক আকাশ

  দেৱদাসীৰ আৰতীৰ খিল্-খিলা্ হাঁহিৰ স’তে

  বিয়পি পৰক দূৰ-দিগন্তলৈ

  শুভ শংখ-ধ্বনিৰ নৱ-নৱ লহৰ,

  সু-উচ্চ পৰ্বতৰ শিখৰ, নদ-মহানদ,

  সাগৰ-মহাসাগৰ কিম্বা মহাকাশলৈ

  ধূলিৰে-ধূসৰিত অগ্নিমন্ত্ৰই বিলাই যাওক

  বতৰা মূষলধাৰ নৱোন্মেষৰ।

মই বিচাৰো-

  শাৰদবানত উটিযাওক মদমত্তৰ মিছা দম্ভ আৰু

  অভিমানপুষ্ট পাপ-তাপ নিঃসৰিত হওক

  বিজয়ত বিসৰ্জিত প্ৰতিমাৰ নিৰ্গমন পথত।

    শেৱালীৰ শুভ্ৰতা আৰু বকুলৰ সুগন্ধিত

    স্নান কৰি সন্তৰ্পণে

    সানিলৈ নিয়ৰৰ আবিৰ গালে-মুখে

    আগবাঢ়ো শৰতৰ মায়াবী পথেৰে

        সুকোমল কঁহুৱাৰ দলিচাত

        আলিঙ্গনৰ দুহাত মেলি

        অদূৰত অপেক্ষাৰত সৌৱা

        চিৰ যৌৱনা শাৰদীৰাণী।