তোমাৰ বাবেই আমাৰ আলোক উপলব্ধি

(মহানুভৱী সাহিত্যিক হোমেন বৰগোহাঞিদেৱৰ প্ৰতি শ্ৰদ্ধাঞ্জলি)

 জিতেন বৰুৱা

​

আমাৰ সৰ্বোচ্চ আলোক উপলব্ধি

অথবা জীৱন-জিজ্ঞাসাৰ আঁৰত তুমি

এয়া আমাৰ আত্ম আৱিষ্কাৰৰ সত্য বাণী

আৰু হৃদয়-চিত্তৰ অকপট স্বীকাৰোক্তি

 

তুমি সাজি দিয়া আখৰৰ সাঁকো বগাই

আমি ব্ৰহ্মাণ্ড দৰ্শন কৰিবলৈ শিকিলোঁ

আৰু জোকাৰি ল’ব পৰা হ’লোঁ

যাত্ৰা পথৰ সকলো ধূলি

বুটলি ল’ব পৰা হ’লো যাত্ৰা কালত উপলব্ধ

সুৰীয়া বাঁহীৰ সকলো স্বৰলিপি

 

হে শব্দ বৰেণ্য,

তুমি নোহোৱাৰ খেদবোৰ আঁতৰাই

তোমাকেই চাইছো জুমি

দেখিছো- তোমাৰ বিশ্বমুখী জীৱনবোধৰ

অভিনৱ শৈলী

 

হে সাধক সনাতন,

কৰ্তব্যৰ পৰা দায়িত্বলৈ

হৃদয়ৰ পৰা সম্প্ৰীতিলৈ

সকলোতে তোমাৰ পৰমতম অৱগাহন

তুমি ইয়াত আঁকি গ’লা

জীৱন গণিতৰ বৰ্ণিল প্ৰীতি

আমি বিভ্ৰান্ত নহ’বলৈ

তুমি ইয়াত থৈ গ’লা প্ৰজ্ঞাৰ অযুত জ্যোতিমালা

বিলাই গ’লা জীৱনৰ নতুন নক্সা

 

হে প্ৰজ্ঞান বৈভৱ,

তোমাৰ প্ৰেৰণাতে আমি সদায়ে গাম

জীৱন জিনাৰ মঙ্গল গান

সময়ৰ ৰং-তুলিকাৰে জীৱন ন’কৈ সজাম৷