।। ।।চিৰ চেনেহী মোৰ ভাষা জননী ।। ।।চিৰ চেনেহী মোৰ ভাষা জননী ।। ।।চিৰ চেনেহী মোৰ ভাষা জননী ।। ।।চিৰ চেনেহী মোৰ ভাষা জননী ।। ।।চিৰ চেনেহী মোৰ ভাষা জননী ।।
‘পঞ্চ নৈ শব্দ ধাৰা’
সংজ্ঞাঃ [পৰিভাষিক অৰ্থ] আমাৰ ভাষাত এষাৰ কথা আছে - “বোলে নামে কি কৰে, গুণেহে সংসাৰ তৰে৷”
তদুপৰি, ভাষাবিদ সত্যনাথ বৰা ডাঙৰীয়াৰ বহল ব্যাকৰণৰ মতে কোৱা হৈছে, কোনো বিশেষ প্ৰাণী বা বস্তুৰ নাম বুজালে তাক সংজ্ঞা বোধক বিশেষ্য বোলে৷ ইফালে ৰ্ধমীয় দৃষ্টিকোণৰ পৰাও নজৰ দিলে দেখা যায় - ভাই মুখে বোলা ৰাম নাম হৃদয়ে ধৰা ৰূপ
এতেকে মুকুতি পাইবা কহিলো স্বৰূপ৷ - কীৰ্ত্তন ঘোষা
মোৰ শ্ৰদ্ধাৰ পাঠক সমাজ৷ এনে ধৰণৰ আধ্যাত্মিক বিষয়ত ৰেহাই ক’তো নাই৷ চাওক - “মৃত্যু কালে অজামিলে পুত্ৰৰ নাম ডাকি আছে, নাৰায়ন-নাৰায়ন বুলি৷”
প্ৰকৃতি-ৰাণীৰ স্থায়ী সম্পদ আহৰন কৰি প্ৰজ্ঞান্বেষী বুদ্ধিজীৱীয়ে যথোপযুক্ত অৰ্থ নিষ্কাশন কৰি ৰং বিৰঙ্ বৰ্ণ সমষ্টিক লৈ বিশেষ সংজ্ঞাবোধক বিশেষ্য পদৰ সৃষ্টি কৰে৷ তেনেকৈ যত পাঁচ খন নদীৰ সমাহাৰ ঘটিছে, তাক জম্বুদ্বীপৰ পাঞ্জাৱ (the Punjab) বোলা হৈছে৷
সেই দৰে বৰ্তমান অসম সাহিত্য সভাৰ অন্তৰ্গত উত্তৰ পাৰত অৱস্থিত ৰস-পম থকা পলসুৱা ভূমিত দ-লৈকে শিপোৱা গা-টনকিয়াল লক্ষীমপুৰ জিলাৰ পৰা অসমীয়া ভাষাত এখন সাময়িকী নিয়মীয়াকৈ প্ৰকাশ কৰাৰ এক বলিষ্ঠ পদক্ষেপ গ্ৰহন কৰা হৈছে৷ আৰু প্ৰস্তাৱিত আলোচনী খনৰ পশ্চাদভূমি (hinterland) ঠাৱৰ কৰা হৈছে উজনি খণ্ডৰ একালৰ বৌদ্ধিক চিন্তা-চৰ্চাৰ ৰূপকাৰ তথা অসামান্য প্ৰতিভাধৰ লোকৰ বাসস্থান হিচাবে অভিহিত ঢকুৱাখানা মহকুমাৰ পৰা বেঙা মেলি এই জিলাৰ নামনি অংশৰ হাৱাজানলৈকে পৰিবেষ্টিত এটা বিস্তীৰ্ণ ভূ-ভাগ সামৰি লোৱা হৈছে৷ দ্বিতীয়তে, এই জিলা খনৰ মাজেদি বৈ যোৱা পাঁচখন দক্ষিন বাহিনী নৈৰ নামেৰে সমগ্ৰ অঞ্চলৰ পঢুৱৈৰ মন-দাপোনত প্ৰতিফলিত হোৱাকৈ, লগতে সম্পাদনা সমিতিৰো সিদ্ধান্ত মৰ্মে ইয়াৰ শিৰোনাম ‘পঞ্চ-নৈ-শব্দধাৰা’ ৰখা হ’ল৷ তৃতীয়তে, ইতিমধ্যে ভাৰত চৰকাৰে নতুন ইতিহাস ৰচনা কৰি অসমীয়া ভাষাকো ধ্ৰুপদী ভাষাৰ মৰ্যাদা প্ৰদান কৰাৰ ব্যতিৰেকে আমি গৌৰৱান্বিত আৰু এই ভাষাৰ প্ৰতি অনুৰাগ থকা শ্ৰেণী বিহীন বিবেকবান সকলৰ মনোবাঞ্চাৰ প্ৰতি সন্মান জনাই ইয়াক ই-আলোচনী (e-magazine) স্বৰূপে প্ৰকাশ কৰাৰ প্ৰস্তুতি চলোৱা হ’ল৷
[নদী কেইখনৰ নাম- চাৰিকড়িয়া, সোৱণশিৰী [স্বৰ্ণশ্ৰী], ৰঙানদী, ডিক্ৰং [দিক্কৰ-বাসিনী] আৰু পিচ্ছিলা >পিছলা৷]
হেম গোস্বামী
জেষ্ঠ সাংবাদিক, লক্ষীমপুৰ